اولى طب.......... وازاى اطلع الاول علي الدفعة

  اولى طب ....... وازاى اطلع الاول علي الدفعة 

 مبروك لكل واحد فيكم على دخولكم كلية الطب البشرى اعظم مجالات الابداع و النهضة و اللى هى من افضل المجالات اللى تنفع و  تخدم بها دينك ووطنك و امتك  و أهلك ...............

كم اتذكر هذه اللحظة التاريخية _بجد_ اللى شوفت فيها الترشيح (كلية الطب البشرى ) ياه حاجة لا توصف ....هى الاحلام بتتحقق بجد ؟!! اه و الله طلعت بتتحقق ...وكله بفضل الله سبحانه وتعالى ...ثم تتوالى الزغايد و التهليل و التكبير و بوس و احضان ...و هيصة ... ومن هذه اللحظة انت كده الحمد لله لزقت فيك الكلمة دى ((ايوا يا دوكتور ...)) فى البيت و الشارع و المحل والبلد و الحته اللى انت ساكن فيها و فى كل مكان ....و حتى فى الكلية بتتعامل من (معظم) الناس باحترام و كله بيقوللك يا دكتور ....بس فى الحقيقة انت مش هتحس انك دكتور بجد الا لما تخش المستشفى و تتعامل مع البشر _مش كل حاجة كتب و مذكرات_ و ده بيكون من سنة رابعة كده و انت طالع .....

بس اهم حاجة احب اقولهالك ...اوعى تفرح اوى !!! اياك تكون مختال فخور و تقعد تتكبر ع الناس وتتمنظر عليهم و تشيل البالطو على ظهرك بقى وشغل الناس التاعبانه دى ...اعرف ان اللى انت فيه ده نعمة من عند ربنا وحده لازم تشكره_سبحانه_ عليها مش تقابل نعمة ربنا بالكبر ...عشان ربنا يوفقك و يزيد نعمه عليك ...

و فى نفس الوقت ما تقعدش تفرح بانك دخلت الكلية اللى كل الناس بتتمناها و الكلام ده و تنسى ان عليك دلوقتى مسئولية كبيرة جدا و انك فى يوم من الايام باذن الله هتكون ارواح ناس فى ايدك ...يعنى لازم تبقى شاطر وفاهم شغلك و عارف انت بتعمل ايه .....لذا , انسى بقى حكاية انك جايب 100 % و زياده ....انما بص للامر على انك لازم تثبت نفسك و تبقى اشطر واحد فى دفعتك و فى بلدك و فى الالم كله ....ماتدنكش عايش فى الوهم ....ابدا بقى وركز ع الجديد ...وادخل بكل اصرار و عزيمة عشان تثبت نفسك وسط زمايلك اللى هم اشطر ناس ...و مش هيبقى سهل ابدا انك تتميز عليهم وانت نايم و عمال تضيع وقتك ... وانما هتتفوق عليهم و تتفوق على نفسك حتى لما تاخد الامر على محمل الجد و تكون قد المسئولية ....من الاخر .....ابدأ صح عشان تكمل صح

المهم خلينا نركز كلامنا دلوقتى على سنة اولى ....و هنتكلم باذن الله عن كل الحاجات اللى انت محتاج تعرفها عشان متبقاش تايه و ضايع و مش فاهم حاجة فى الاول كده

قالولنا : ذاكر السنتين دول و اطحن نفسك عشان تستريح بعد كده لما تخش الكلية ...الكلام ده صحيح ؟؟؟

الكذاب بيروح النار .......مش هقول اكتر من كده .....هههههه

كلية الطب تتميز بانك هتذاكر فيها زى ثانوى بالظبط و يمكن اكتر كمان ...لانك مش بتذاكر عشان تجيب امتياز (85%) و لا جيد جدا ..و لا الهبل ده ...انت بتذاكر عشان تطلع الاول (السنة اللى فاتت كان الاول ناقص عشر درجات بس فى كل الامتحانات عملى نظرى شفوى اعمال سنة ...معنى كده انك تذاكر و تشتغل على اساس انك متنقصش ولا فتفوتة يعنى متفرطش فى ربع درجة ) ...والناس التعبانة بتذاكر عشان تطلع من الخمسين الاوائل و التعبانين اوى بيذاكروا عشان يطلعوا من اول 100 ....لان اللى بيتعين فى الجامعه و يبقى بيدرس فيها بعدين ...بيكون من اول 100 و الباقى بيروحوا مستشفيات وزارة الصحة ...وما ادراك ما الفارق الرهيب فى كل حاجة بين الجامعه و الصحة ...و هنتكلم باذن الله عن الموضوع ده كمان شوية....

يعنى من الاخر انسى حكاية "الحياة الجامعية" و "استريح و اخلص براحتى" و الخرف ده .....انت يا حبيبى فى طب هنا زى ثانوى بالظبط مذاكرة و طحن و امتحانات مختلفة الاشكال و الاحجام على طول على مدار السنة ...مش مجرد امتحان نظرى فى الاخر و خلاص زى ثانوى ...وانما كل شوية عندك امتحان فى ماده شكل ...فعشان كده لازم تبدا من اول يوم و لازم تكون مستعد و بتذاكر اول باول بتراجع بصفه مستمرة

يعنى ايه كلية الطب ؟؟

بص يا سيدى ...كلية الطب دى احدى كليات القمة , بتقعد تدرس فيها 3 سنين نظرى(academic) و 3 سنين عملى (clinical ) وبعدين سنة امتياز ...ودى بتقضيها فى المستشفى و بتشتغل تقريبا فى كل التخصصات و بعدين تحدد القسم اللى انت هاتتخصص فيه

طيب ايه الاقسام دى ؟؟

بص ...ده سؤال طويل اوى عشان اجاوبه محتاج ست سنين!!! ...ماتشغلش بالك انت هتشوف كل الاقسام وهتدرس فى كل المواد مش مهم اوى تعرف اسماء الاقسام دلوقتى ...انما اعرف اللى عليك ف سنة اولى وخلاص ...هم اربع مواد بس ..جايين ان شاء الله فى الكلام

ماشى يا سيدى ..طب كلمنى بقى عن اللغة ...ألّا هو احنا صحيح هندرس بالعنجليزى ؟؟

اول حاجة بتيجى فبالك لما تعرف انك هتخش طب ...هى ازاى هدرس بالانجليزى؟؟؟؟؟؟؟؟؟؟؟؟؟؟؟؟!!!!!!!!!!!!!!!!!!!!!!!!!!!!!جنان ده و لا ايه؟؟

وبتقعد تعقد فى نفسك و تتشنج ...وتسألأ نفسك كده : يعنى احنا هنحفظ المناهج ازاى وهى بلغة تانية ..ازاى يعنى ؟؟ د هانا قعدت احفظ فى قصة الانجليزى سنة كاملة و كنا بنحفظها بطلوع الروح و و و و و و ....

الرد : نفض كل الكلام ده من دماغك .........

اعرف المعلومة دى و هى هتريح بالك خالص .....

المخ بيفكر بالصور !!!

يعنى لو انا قلتلك : برتقالة ....هل هيختلف الامر معاك لو قلتلك orange ؟؟؟؟

اول حاجة بتيجى ف بالك هى صورة البرتقانة بغض النظر عن اللغة اللى اتقالت بيها ...لانك و انت صغير اتعلمت فى الحضانة او المدرسة ان orange يعنى كورة مدورة كده و بتتاكل ولونها برتقالى ...ونفس الكلام عرفت ان سمها "برتقاله"

انا اقصد ان اى كلمة تربطها بالحاجة اللى تدل عليها و تكررها على مخك ...خلاص بتلاقيها مفهومة وزى الفل ومفيش مشاكل نفس الفكرة كده بالظبط مع اى كلمة واى لغة ...انت مخك بييجي فيه صورة الحاجة مش اللغة اللى بتتكتب بيها

وعشان كده نيجى للخطوة اللى بعد كده و هى (الترجمة).......بس استنى..

انت كده عرفت ان حكاية اللغة دى اسهل ما يمكن و بتعدى من غير ما تحس بيها و هتحفظ الكلام الجديد بمنتهى السهولة ...والامور هتبقى تمام التمام ...اذن اوعى تخاف منها او تعقد نفسك ...و ان شاء الله هفصل الموضوع ده تحت...استمر .

نأتى بقى للترجمة ؟؟

الترجمة دى بتبقى مدتها شهر ونص كده من بداية مذاكرتك !!!...يعنى لو بدات مذاكرة من الاول _من اول ثانية فى الكلية_ هتخلص حكاية مسكة القاموس دى فى نص عشرة او 11 كده ...يعنى اول شهر ونص بتبقى عملية المذاكرة فيه منقسمة الى (ترجمة + حفظ اللى بتاخده بعد ما ترجمته يعنى مش مجرد ترجمة و تنام ...)

اما لو بدات متأخر_والعياذ بالله_ فنفس المده هتاخدها فى الترجمة و ساعتها هتعيش فى جو الانضغاط النفسى المميت اللى ممكن يخلى الواحد يولع ف نفسه!!

لا انت عارف تجيب القديم و لا تلم مع الجديد و بتعيش فى الدوامة السودا دى ...والعياذ بالله ....نفهم من كده ان المذاكرة يوم بيوم و درس بدرس و محاضرة بمحاضرة ....و اقسم بالله العلى العظيم ان اهم حاجة طلعت بيها من سنة اولى هى ...القاعدة الذهبية اللى طول عمرنا كنا بنتريق عليها و نهملها

لا تؤجل عمل اليوم الى الغد

بجد ممكن كان يحصل فى اى سنة فاتت انك تذاكر الحاجة مش فى يومها ..الا فى طب ...لازم اللى تاخده النهارده ..تروح تذاكره فى نفس اليوم ...مفيش حاجة اسمها بكره ....لانك بكرة هتاخد حاجات تانية و تتراكم عليك و هكذا ...وييجى يوم الاجازة تقول انا تعبان و برده متلمش حاجة لحد ما تلاقى الدنيا كلها فوق راسك و تعيش فى احباط و ياس رهيب ...........ليه يا عم كل ده ..ما كان من الاول اللى تاخده تروح البيت تموت نفسك عشان تخلصه ف نفس اليوم عشان تستريح و متتعقدش من كترة تراكم الحاجات عليك

الحل الامثل لعملية الترجمة :

(اسألنى شكرا) .......اسأل حد اكبر منك فى الكلمات الصعبة ....يعنى تحط خط تحت الكلمات الجديدة و الصعبة اللى موجوده فى الخمس صفحات اللى انشرحوا النهارده..فى المحاضرة ...فى البداية هتحط خط تحت كل فتفوتة فى الصفحة بس بعد كده هتلاقى الموضوع بيقل تدريجيا ......بس اهم حاجة انك متروحش بيتك الا وكل اللى انت خدته خليت حد يترجمهولك ... ومش هاتلاقى اكتر من "المترجمين " فى الكلية ....اى حد يتمنى انه يخدمك و يساعدك لما يعرف انك فى اولى ...اسال ناس مختلفة عشان متقلش على نفس الراجل كل يوم ... واسال الدكاتره والناس بتوع الاسر و اسال طلبة تانية بالخصوص واسال اى حد تقابله فى معنى كل حاجة تخطر فى بالك ...بحيث ماينتهيش اليوم الدراسى الا "على الحفظ " يعنى انت مروح تحفظ اللى خدته مش رايح بيتك لسة تضيع وقت كمان فى ترجمة و بتاع ....بجد اللى هيعمل كده هيوفر على نفسه وقت وجهد كبير جدا ....متكسفش انك تسال فى كل حاجة و كل كلمة و لو سالت ميت مرة ايه يعنى كل الناس بتحب تتسال عشان تساعد ...ركز الحته دى مهمة.

القواميس :

(1)اشترى قاموس طبى رخيص مش لازم الغالى ...انت كده كده مش هتحتاجه كتير

(2) استخدم ال dictionary بتاع تانية ثانوى "الكبير" ..ده هتحتاجة اكتر من التانى حتى .

(3) لا تستخدم قاموس ال google مطلقا ...لانه من اكتر الحاجات اللى بتضيع الوقت ...لانك بتقعد تعدى من الكلمة لل صور للويكيبيديا لل فيس ....وبالتالى الوقت بيضيع و ما بتستفادش حاجة ....واليوم بيعدى من غير ما تعمل حاجة مفيدة .....ولكن استخدم القاموس الانجليزى و القاموس الطبى ...زبس طبعا لما ترجع بيتك و انت مترجم الكلمات الصعبة فى الكلية ...بتستريح جدا جدا ....

-------------------------------------------------------------------------

اذاكر كام ساعة فى اليوم (وقت المذاكرة)؟؟

} وَلِكُلٍّ دَرَجَاتٌ مِّمَّا عَمِلُوا وَلِيُوَفِّيَهُمْ أَعْمَالَهُمْ وَهُمْ لا يُظْلَمُونَ {

تتميز كلية الطب بانها اكتر كلية محتاجة مذاكرة وحفظ ... وده لانها بتعدك عشان تكون " طبيب " و الطبيب ده ..لازم يكون عالم بشغله و عارف لطبيعة عمله ...يعنى لازم يكون حافظ و عارف كل حاجة ...عشان كده انت كطالب طب ...لازم تكون عارف و حافظ كل حاجة فى منهجك ...وعشان كده بتتنوع الاسئلة اللى اللى بتقيمك كطبيب .. ما بين اعمال السنة ...ودى بتبقى شهريا كده وممكن كل اسبوعين تلاقى امتحانات سواء بدرجات او بدون ...عشان تخلليكوا تذاكروا اول باول ...نيجى بقى لعدد ساعات المذاكرة ....ده بيختلف من شخص للتانى على حسب اهداف كل شخص ...فالشخص اللى عايز يطلع الاول ع الدفعة لازم يذاكر و يطحن نفسه دح عشان ربنا يكرمه و يحقق له امله...عشان كده انا هديك الطريقة اللى تلاقى باذن الله بيها 12 ساعة فى اليوم للمذاكرة :-

الطريقة الاولى (خفافيش الظلام ): انت لازم اول ما ترجع بيتك تنام لك ساعتين او قول بالغداء و الصلاة ...يبقوا 3 ساعات ....يعنى قول الساعة دلوقتى 6 المغرب ....عندك من 6 المغرب لحد 6 الصبح وقت متاح للمذاكرة وبعدين نام ساعتين كمان ...والله لو قدرت تخلص اللى عليك فى خمس ساعات و راجعت ع القديم فى ساعتين كده يبقى انت مية مية وتمام التمام ....اما لو ملحقتش "فى اول السنة ..غالبا " فالوقت لسة متاح عندك ... و طريقة خفافيش الظلام دى للناس اللى بتحب تلاقى الوقت قدامها براح و تحس بالاطمئنان كده و هى بتذاكر وتاخد راحتها فى االحفظ والاعادة و الازادة ... وغالبا الناس دى بتذاكر بالكتابة "ورقة وقلم "غالبا ..وهذه الطريقة تحتاج الى المنبهات المتنوعة لتساعد على السهر , ودى شوية طرق كده ع السريع عشان تفوق و ماتنامش باليل :

1 / انك تكون نمت ال3 ساعات اللى قلنا عليهم.

2/ " قوة الهدف " ودى اعظم حاجة ممكن تخليك صاحى و مركز ... وهى استشعار ان السهر والمذاكرة دى حاجة مفروغ منها واجبة لازمة حتمية ...كأنى صابح بكرة امتحان اخر السنة ...عيش الهدف اوى (هانتكلم عن الهدف تحت ان شاء الله) و ضع نفسك فى الفعل ...كانك بجد عندك بكرة امتحان فى اللى انت لسة واخده النهارده ....وساعتها مش هتحتاج لاى منبهات ...كفاية قوة الهدف و الامل و استشعار الجهاد و الكفاح ...اعتبر نفسك كأنك بتذاكر عشان تخش طب!!!بالظبط ..لان ده كان اقوى هدف عندك قبل كده غالبا ...وعشان كده استرجع ذكريات سهرك فى ثانوى كده و عيشها و حققها تانى بس لهدف اكبر بكتيييير..

3/ القهوة و النسكافيه و خلافه ...بلاش تزود ابدا مهما كان عن فنجان قهوة ...او كوبايتين نسكافيه عشان متتعبش قلبك و مخك ...

4/ دوش الميه الساقعه " وخصوصا فى الشتاء"O_o ...ولا بلاش الدوش ,خليها غسل الشعر و الراس و الوش و خلاص ...اصلى عارف ممكن تاخد الدش من هنا و تمدد ع االسرير من هنا تصحى تالت يوم على طول!!

5/ اجرى فى المكان ...اتحرك ....غير وضعي جسمك ...الرياضة من اروع الحاجات اللى بتشغل السمبثاتيك "السمبثاوى يعنى...هههه" وهو مسئول عن اليقظة والانتباه

6/ اياك تذاكر و انت ع السرير او وانت رافع رجليك ع السرير او على كرسى ...لازم رجليك لتحت ..وراسك فوق ...ضهرك مفرود او مائل قليلا ع المكتب ...اياك ترجعه لورا ع الكرسى ... وف نفس الوقت اياك تنام ع الكتب

7/ بعد كل ده برده هاتلاقيك عايز تنام .....اياك تستسلم ....وانما اعد الخطوات اللى فاتت كلها و لو قعدت طول الليل تجرى فى المكا ن المهم انك ماتستسلمش للنوم .....فى حل كمان : ممكن تشرب "بيريل" : عشان تسترجل !!!

طبعا بهزر .., انا اقصد انك اعمل اى حاجة عشان تدنك صاحى ....استرجل دى بقى تكلم بيها نفسك :"استرجل ياله ...فوووق" ...لازم تحس فعلا انك مسيطر على نفسك و هاتمشيها فى الطريق الصح غصب عنها ...من الاخر بجد ...استرجل و حقق هدفك.... و تذكر قول الاصمعى : "من لم يحتمل ذل التعلم ساعة , بقى فى ذل الجهل ابدا"

8/ ابقى علّى صوت القران او الموسيقى لو انت بتذاكر وانت بتسمع حاجة ....

الطريقة التانية : لما ترجع بيتك عندك اختيارين : اما انك تنام الساعتين تلاتة اول ماترجع عشان تشحن الطاقة فى جسمك تانى ....او تتغدى و تصلى و تبدأ على طول لحد الساعة 9 بعد العشاء كده و تنام لحد الفجر وبعدين تصحى تكمل تانى ...و الطريقة دى بتبقى مناسبه فى اول السنة و خصوصا للناس السمعيين "اللى بيذاكر من غير ورقة و قلم " بس كلما تقدمت بك الاحوال فى الكلية ...بيتحول الناس الى الطريقة اللى تناسب المطلوب منهم ....لحد ما بتوصل على اخر السنة الى 16 ساعة مذاكرة!!!!!×_× O_o تمام .. وساعات بيبقوا 24 ساعة !!!!!!!!!

طبعا دول الناس اللى فى دماغهم ترتيب و تفوق ....مش اللى عايزين يجيبوا 85%"امتياز" وخلاص...!!!

و ممكن و انت بتذاكر تشغل قراّن او اى حاجة مفيهاش كلام ...زى خلفية كده ...بس ماتكونش هادية اوى عشان ماتنامش و ممكن تشغل قران و تخفض صوته ...ولو لقيتك هاتنام ....ابقى على صوت اللى بتسمعه جدا لحد ما تفوق ....

ونخللى بالنا ان من المهم جدا انك تكون فى بيتك الساعه 3 سواء كنت بتحضر محاضرات او بتاخد دروس نظم نفسك بحث تروح بدرى ...عشان لو كنت بتروح على 5 او 6 فالامور بتبوظ الخطتين دول خالص ....طبعا الا لو اضررت فى يوم ولا حاجة ...مش مهم ...انما مش يبقى على طول .

___________________________________________

***طريقة المذاكرة ازاى ؟

بص يا ريس ....

السؤال ده بجد هو تانى اهم حاجة فى الكتاب ده بعد حته : "المذاكرة اول باول و انك لازم تحفظ اللى مكتوب صم و تنسخه ف عقلك ...copy عشان تحطه فى الامتحان "paste .........,

بيتخيل الناس لما ييجوا داخلين كلية الطب انهم خلاص مش هيحفظوا تانى ...زى زمان بقى خلاص ...و بيفتكروا انهم هيكتفوا بالفهم و خلاويص ....طبعا مش محتاج اقولكم ا نده قمة الخرف ... وهو ده سبب ضيعنى فى اول السنة لحد ما ربنا اكرمنى و عرفنى ...انت يا عمى داخل تحفظ زى ما كنت بتحفظ بالظبط فى ثانوى لانك هتمتحن زى ثانوى و اكتر ...تخيل الدكتور بيسألك فى الشفوى ...هتقول ايه ...هتقول انا فاهم بس مش حافظ ....!!! ؟؟ ما ترد يا متعلم يا بتاع المدارس ..هاتقول للراجل ايه ساعتها ؟؟!!

- ايه ده يعنى انا لازم احفظ ؟!:(

-ايوة طبعا لازم تحفظ ...

- ازاى يا عم هو انا كنت داخل طب عشان احفظ و لا عشان افهم وابقى دكتور و عالم ؟

- يابنى مانت لازم تنجح الاول عشان تبقى عالم ...هو فى عالم مبيعديش السنة ...!! مانت لو محفظتش مش هتجاوب ...ساعتها مش هتبقى اى حاجة ...فلازم تحفظ اللى بتاخده اولا و بعدين لما ربنا يكرمك وتتخصص فى مجال معين ....ابقى طلع عينه ثقافة و فهم عميق ...بس المهم دلوقتى انك احفظ اللى عليك و اهتم بكل المواد زى بعضها ....اياك ان تذاكر مواد و تهمل فى مواد ....الحاجة اللى بتهملها بتنقصك درجات ...وانت محتاج كل ذرّة درجة عشان التقدير تراكمى على مدى السنوات كلها ....تخيل انها بتفرق على درجة و احده !!!مين يتعين فى الكلية و مين يترمى فى الصحة !!!!

-طب خلاص انا اقتنعت و هاحفظ ...قولى بقى على طريقة للحفظ ؟؟؟

- هى نفس طريقتك بتاعتك اللى انت دخلت بيها طب ....واياك تصدق اى حد يقوللك : غيّر طريقتك و احفظ بالطريقة الفلانية ....دى طبيعة ناس ...

لو انت مثلا بتحفظ بالورقة و القلم و ما بتقتنعش انك ذاكرت الا لو كتبت الحاجة ...خلاص يبقى زى ما انت و هاتلاقى الوقت اللى يلزمك ونص ....

اما لو انت بتذاكر بطريقة التسميع " من الصوتيين الاحرار " فعادى جدا زى مانت ....

ع العموم

هاتلاقى الامور بتاخد منك وقت كتيير جدا فى الاول فقط ...بس كل ما تتقدم فى المذاكرة و الدراسة و الوقت يمر بتلاقى ان الامور بقت سهلة جدا ....

زى الطفل اللى بيتعلم المشى

و زى اى حد فينا لما ابتدى يكتب على الكى بورد ..كان بيقعد يدَوّر ع الحروف و يدوس بصباع واحد ع الزرار... وياخد سنة على ما يعرف يكتب جملة مفيده ! ....نفس الحكاية كده انت كطالب اولى طب فى اول شهر كده ....بتذاكر و تحفظ بس مستشعر صعوبة الامر ...بس شوية و تلاقى الامور بقت سهلة جدا جدا ان شاء الله و اسهل من اى سنة فاتت كمان ....يعنى اتذكر ان "الصفحة" الحلوة كده اللى مالية هدومها كانت بتاخد على اخر السنة منى حوالى نص ساعة حفظ ...فى اول السنة كانت بتاخد نصف قرن !!!!! بس هتعمل ايه لازم تذاكر وتحفظ من الاول عشان الامور تبقى سهلة بعد كده ....كده يا معلم انت تمام مش محتاج اكتر من كده توضيح ...استمر....

طب ماشى ...قوللى يا ريس ايه المختلف فى الحياة الجامعية عن الحياة المدرسية ؟؟

*بالنسبة للناس اللى عايزة تطلع الاول و اللى عايزة تطلع من الاوائل : مفيش اى فرق مذاكرة و حفظ و دح وخلاص ...مع قليل من القراءة و التثقف (ساعة الا ربع يوميا كده تقعد تقرا فيهم او ترفه فيهم عن نفسك )

*بالنسبة للى مش فى دماغه او التايهين: بيروح بقى يضيع وقته فاى حاجة ..شوية يصيع هنا و شويه هناك يمشى مع دى و يكلم دى و يتمسخر فى الكافيتيريا و يقلب من المحاضرات و السكاشن و فى الاخر بيسقط او يجيب درجات زى الزفت ...و يشرب سجاير و فى ناس بتشم !!!اه والله كل حاجة موجوده ...بس طبعا نسبة الناس دى فى طب قليلة جدا ....

*مع العلم ان فى حاجة جديدة عليكم موجوده فى الكلية اسمها ...الاسر ....اسرة كذا واسرة كذا ...الاسر دى بتعمل نشاطات جميلة اوى ..تطلع رحلات ...تعمل قوافل طبية ... تلم تبرعات لحاجة معينة ...تعمل انشطة رياضية و كده ....غالبا الطالب فى اولى مبيلاقيش وقت يستحمى اه والله و هتشوفوا !! وعشان كده نسبة المشاركين فى الاسر بيبقى قليل اوى فى اولى بس بعد كده لما الواحد يفهم النظام ماشى ازاى و ازاى ينظم وقته و يظبط اموره ممكن يبقى يشارك و يتفاعل ......بس طبعا كل واحد ادرى بحاله لو عايز تشارك فى الاسره اللى عاجباك ..بحيث ماتضيعش وقتك ...خلاص يبقى ع البركه....بس اهم حاجة وقتك و مذاكرتك لان ده اللى هتتحاسب عليه : دنيويا(درجاتك و تقديرك ) وهو اللى هتتحاسب عليه فى الاخرة ...فحافظ عليه و نظم امورك

*اه و احب اقولكم محدش يخاف انه هيروح الكلية ..اى نعم ده غير نظام البلطجة اللى كنا فيه فى ثانوى مبنروحش المدرسة و لا يوم ....فانت هتروح الجامعة تاخد محاضراتك و سكاشنك ...و برده هتلاقى ال12 ساعه اللى كنت بتذاكرهم فى ثانوى و هقولك ازاى كمان شوية ...فمتقلقش خالص من حكاية مرواح الكلية دى ...عادى يعنى .

فى بقى حاجة غاية فى الاهمية ....انت دلوقتى فى مرحلة الشباب و دى المرحلة اللى لازم تبنى فيها نفسك و تكون ليك شخصية ....و كلية الطب (الست سنين بتوعها دول ) اروع فرصة عشان تكون الشخصية المستقلة اللى تطمح اليها ....الحياة مش بس مذاكرة و امتحانات و خلاص ...لا د ه انت لازم عليك انك تبدأ بقى فى تكوين اراءك الخاصة عن كل شىء فى الحياة ....لازم تقدم على خطوة (القراءة) لانها بجد هى سر تقدم الحضارة وسر النهضة و هى سبيلك عشان تبقى انسان مثقف محترم فاهم فى كل حاجة ....عشان كده لازم تبدأ تنمى شخصيتك و تقرا فى المجالات المختلفة ..اهم هذه المجالات هى :

*الدين ...اعرف دينك ...اقرا فى كتب السيرة ...سيرة النبى_صلى الله عليه وسلم _ وسير الصحابة و الصالحين ...و تقرا فى الفقه و التفسير و فى كل المجالات ..واروع حاجة انك تحفظ كل يوم صفحة قران ..مش هتاخد تلت ساعة حتى ابقى جرب كده حاجة غريبة بجد قبل مادخل الكلية كنت باخد ساعه فى الصفحة و بعد لما درست بالانجليزى حبه كده بقيت بحفظ العربى و خصوصا القران بسرعه جدا و اتخيل كده لما تخلص السنة دى و تكمل فى الاجازة ...هاتلاقيك حفظت القران كله !!!يااااااااارب

*التنمية البشرية ....اروع شىء_بعد الدين_ ممكن تقرا فيه عشان تعيش صح ...اروع ما عرفته الى الان فى حياتى _بعد الاسلام_ عارف يعنى ايه تعيش صح ...يعنى تبقى مسيطر على حياتك فى كل جوانبها على المستوى الشخصى الصحى الاجتماعى العائلى المادى المهنى ....يعنى من الاخر( ازاى تعمل الصح ) ومن اروع الناس اللى ممكن تقرا لهم : د/ابراهيم الفقى ...والاف الناس التانية الممتازين ...........والكتب بتاعتهم مالية الدنيا سواء ع النت ا و كتب ورقية ...انا عن نفسى افضل الكتب الورقية ____بس نصيحة : اوعى تقعد تشترى كتب و ماتقراهاش او تقعد تحمل فى كتب من النت و خلاص و لكن اشترى الكتاب او اقراه من ع النت و متدخلش فى اللى بعده الا لما تخلص الاولانى

*السياسة ..حلم كبير لمعظمنا انه يخدم وطنه وبلده و دينه ...وعشان كده بيطمح الى انه يكون مثلا نائب فى مجلس الشعب او وزير او رئيس وزراء او رئيس جمهورية وده طبعا ممكن جدا يتحقق طالما كان وراه صبر واصرار و كفاح وحسن نية ...وسبيلك لهذا هو القراءة..

بس طبعا زى ما اتفقنا ان اهم شىء فى حياتنا دلوقتى هو وقت الدراسة و المذاكرة واتقان العمل اللى ربنا فرضه علينا ...وعشان كده هيكون (وقت القراءة) (وقت بناء انفسنا بجد) ساعة كل يوم ..يعنى مش هتضيع وقتك ولا اى حاجة وبدل ما الساعة دى كده كده بتضيع فى اى كلام فارغ : فيس تلفزيون كلام اكل لمجرد الاكل وخلاص ...وغيرها من الامور التافهة اللى الواحد وقته بيضيع فيها لو مش حاكم نفسه كويس.....بدل ده كله هيكون لينا ساعه فى اليوم :

1) نرفه فيها عن نفسنا و نستريح من الماكرة شوية

2) نستفيد فيها اعظم استفاده ف حياتنا و هى (بناء الذات) سواء تحفظ قران او تقرا تنمية بشرية او ثقافة او اللى انت عايزه ...

3) تحس بالانجاز بجد ...و حياتك ماتضيعش فى الكلية ...وانما تستفيد بالست سنين دول فى انك تكون ذا شخصية رائعة و متفتحة ومثقفة ...مش مجرد عيل زى ما دخل زى زى ما خرج و ضيع عمره ع الفاضى ......

هى ساعة واحدة ...أه ..بس كل يوم ...فى ست سنين .....صدقنى تقدر تبنى حياتك بجد ...

* ايه ده هاقعد 7 سنين بادرس؟!ليه؟!!!

اوعى تستكتر السنين دى ....انت مش هتحس بيهم ...ببساطة لان كل يوم بيجيب اللى بعهد و كل سنة بتجيب اللى بعدها ...ولك ان تعلم ان بقالك فى الدنيا اكتر من 18 سنة بحالهم!!! وعدوا ولا الهوا ... وانت لسة فاكر نفسك فى سنة اولة و اولى اعدادى و اولى ثانوى و بقيت اهو فاولى طب ... وكمان شوية هيبقى عيالك فاولى ابتدائى...يااااااااااه !! الايام بتطيييييييييييير ف ثوانى كل حاجة بتخلص ... فعشان كده اياك تقعد تحسبها و تفكر .. وتقول ست سنين بقى و بتاع ...لا سيبك من كده ... وبص للجانب المشرق ....فالست سنين دول فرصة راااااااائعة عشان تبنى فيهم نفسك و تتعلم اولا الطب و ثانيا حاجات تانية كتير جدا ....وزى ما اتكلمت معا كفى فقرة القراءة ....انت ممكن تبقى على نهاية الست سنين دول حاجة تانية خالص ...هتبقى ناضج بجد...اذن فالست سنين دول مش حاجة سلبية ولاسيئة زى مانت فاكر ..ولكن فى ايدك تحولهم لاحسن و اعظم ست سنين فى حياتك ....

*اوصف لى كده احوال الناس فى اول السنة ؟؟

اول شهر كده من سنة اولى طب ...بيختلف عن كل الشهور و السنين اللى فى حياتك قبل و بعد كده .....بتلاقى الناس تايهة و محدش عارف حاجة و لغة جديدة و اللى حفظ له كلمتين فى الاجازة وقاعد يتمنظر على خلق الله ... والدكاتره اللى تخش تشرح كأنها بتدرس ل"دكاتره" عذرا فى اللفظ يعنى ...هههه...و بتبقى مش عارف انت هتاخد ايه و لا تجيب ايه و لا تذاكر منين ... وتلاقى الناس كلها بتبص لبعض بنظرات خبيثة يملؤها الرهبة و الرغبة و التوجس ...!!!...وياسلام لو لقوا الواحد مشخبط فى الكتاب ولا مخطط كده خطين تلاتة -------> امسكووووووووه انت بتذاكر ياض من ورانا ...عميل ...مندس ....اعكشوا الواد ده ....حالة من التوهان الرهيب ...فى من الناس اللى بيخرج منها ...ومنهم اللى بيسيب الكلية عشانها!!!!!!!!!!و هو ده السبب اللى خلانى اكتب الكتاب ده ..عشان محدش فيكم يلاقى اى صعوبة او توهان فى البداية باذن الله العلى العظيم .....

__________________________________________

 طريقة راائعة للمراجعة و تثبيت المعلومات فى الدماغ .

---------__________---------------__________----------____

الحاجة اللى بتاخدها فى المحاضرة( او الدرس) زى ما اتفقنا اول ما تروح البيت بتذاكرها و تطحنها ......و بعدين؟؟!!.....هاتيجى تانى يوم هاتلاقيك مش فاكر ذرة من اللى انت ذاكرته ...اتبخر!!!!!.....مع انك تعبت فيه....طيب ايه الحل ؟؟؟

بص يا سيدى ....اول ما تروح الكلية(او الكورس) تانى يوم ...هتاخد حاجات تانية ...وكالعاده ...هاتخللى اى حد يترجم لك الكلمات الصعبة ...عشان ترجع بيتك على الحفظ على طول مش لسة هاتقعد تترجم ......جميل؟ ماشى .....وبعدين هاتحفظ اللى انت خدته النهارده(هاتحفظ الجديد) و بعدين لما تخلصه ...لازم حتما و لابد انك تراجع اللى خدته امبارح ....انت بجد لازم تعمل كده ....و صدقنى هاتلاقى الوقت لده والامور سهله ان شاء الله....بس ركز! لازم تراجع القديم مع الجديد .......بص معايا كده فى الطريقة دى عشان تراجع كل حاجة

9 مرات ع الاقل  :

--------------------------------------

المرةالاولى : اول مرة تذاكرفيها الحاجة اللى خدتها

المرة التانية : قبل ما تخش المحاضرة او الدرس(سمّع لنفسك اللى انت ذاكرته قبل ما تخش )

المرة التالتة: تانى يوم مع مذاكرة الجديد اللى انت خدته

المرة الرابعه : فى يومين الاجازة اللى عندك (جمعة و سبت )تراجع اللى خدته طول الاسبوع ....و تحل عليه اسئلة من اى كتاب اسئله عندك ....

المرة الخامسة : لو عندك امتحان(بدون درجات) فى السكشن او المحاضرة او الدرس زى امتحانات الدروس فى ثانوى كده .............ولو ماعملوش لكم امتحان ...اعمل انت امتحان لنفسك بصورة دوريه كده

المرة السادسة : مراجعة امتحان اعمال السنة .... و هم بيكونوا كذا امتحان مش واحد بس

المرة السابعة: قبل امتحانات نص السنة (تبع اعمال السنة برده)

المرة التامنة : فى الاسبوعين اللى قبل العملى

المرة التاسعة: قبل امتحان النظرى ..(اخر السنة) ...

____الموضوع بتاع المراجعة ده مهم جدا____خلى بالك ___

يعنى ايه محاضرة ويعنى ايه سكشن ..؟؟

المحاضرة : دى زى الحصة فى المدرسة او الدرس ...وفيها بيدخل دكتور يشرح على السبورة او الداتاشو(Power point) وانت بتكون قاعد فى المدرج الكبير مع كل الدفعة .. و مفيش فيها غياب ....بس مش عارف النظام الجديد ممكن يكون في غياب فى المحاضرة ....الغياب ده لو انت عديت نسبة معين "تخطيت المسموح " بتحرم من دخول الامتحان " والعياذ بالله"

اما السكشن : بتتقسم الدفعة لحوالى ست مجموعات ..من رقم1 الى 100 مجموعة أ ومن 101 الى 200 مجموعة ب ...وهكذا ....و بعد كده كل مجموعة بتتقسم لنصين غالبا ...كل نص فى سكشن "قاعة اصغر من المدرج " .....وفى السكشن بيتم شرح العملى ...يعنى تجارب و شرايح و كده انما مفيش نظرى "بتاع المحاضرة"بيشرح فيها ...ماعدا الاناتومى كان السنين اللى فاتت بيشرحوا فى السكشن نظرى و عملى عادى ....

____________________________________________

ايه المواد اللى عليا السنادى؟

المواد اللى فى اولى هم اربع مواد :

اناتومى"تشريح"

فسيولوجى"علم وظائف الاعضاء"

هستولوجى "علم دراسة الانسجة"

بيوكيميسترى"كيمياء حيوية"

وفى مادة الانجليزى و دى سيبك خالص خالص خالص ...اوعى تشغل بالك ...هى حته مذكرة الكلية بتبيعها فى اخر السنة بييجى منها الامتحان ....وبتجيب 25 من 25 وتمام ...ولا تضاف للمجموع .

__---

الاناتومى

يعنى ايه؟

دى المادة اللى هتدرس فيها اجزاء جسم الانسان :مقدمة عامة ..و الايدين عضلاتها بالشرايين و الاورده و الاعصاب و مسار كل واحد فيهم جاى منين ورايح فين و الصدر بالرئتين و القلب و البطن بكل ما فيها ..كبد كلاوى و النونّات"الاجنة يعنى..ههههه" ...بتعرف مكان العضو و حبة تحابيش كده خاصة بيه

فروع الدراسة؟

General ----->"مقدمة "

Upper limb الطرف العلوى

Thorax الصدر

Abdomen البطن

مقدمات علم الاجنة : embryology

درجات المادة وتوزيها : المادة دى ب 250 درجة ....اكبر درجة للنظرى125 يليها اعمال السنة و الشفوى و العملى .....

درجة الصعوبة :...مفيش حاجة اسمها صعب ...كل المواد محتاجة مذاكرة و مراجعه كتير بس نظرا لان الماده دى كبيرة شوية فهى تصنف ان ترتيبها التانى بعد الفسيولوجى ....وماتخافش! كل حاجة سهلة ان شاء الله...

طريقة المذاكرة: زى ما قولنا طريقة المذاكرة بتختلف من شخص لاخر ..يعنى زى مانت عادى متغيرش طريقتك و لا حاجة ....بس الاناتومى بيحتاج صور كتيير ...لانه عباره عن" تشريح " يعنى حاجة و بتوصفها فلازم تبقى مذاكرتك فيها تعتمد على الصور مع الحفظ النظرى عادى ...

....و تتميز الاناتومى بانها تانى اسرع مادة بتتبخر من الدماغ بعد الهستولوجى ...عشان كده محتاج مراجعه كتيير اوى ......وفى حاجة بقى عايز اقولهالك ....فى الupper ان شاء الله لما تدرس الشرايين و الاعصاب الكتيرة دى ...ممكن تتلخبط بينهم او تتوه ...عشان كده لازم تستخدم طرق جديدة فى الحفظ تسهل بيها الامر ...عشان متنساش و متتلخبطش .....و ان شاء الله هتلاقى تحت "طرق ابداعية للحفظ فى الكلية " هتساعدك جدا باذن الله ....

ملحوظة:

السكاشن بتاعتها ...لازم تذاكر العملى اول باول من اول السنة و اللى تاخده سواء فى المحاضرة او السكشن تروح تحفظه على طول .... و فى نفس الوقت لازم تروح المشرحة تتفرج على الجارات من اول ماتاخد الحاجة ...متستناش الدكتور يوديك المتحف بنفسه و لا تستنى صحابك و لا حد ...و لكن ابدا م ن اول السنة ...و شوف الجارات و احفظ الجارات عشان دى اللى هتمتحنها فى اعمال السنة و فى العملى ف اخر السنة ...فلازم تكون مذاكرها كويس ... وكمان لما تشوف الحاجات من الاول احسن مليار مرة من انك تتأخر لحد اخر السنة و ساعتها بيبقى متحف التشريح اللى عبارة عن 3 حجرات ده شايل 800 طالب .... و يا سلام بقى ع الناس اللى بتنام قدام الجار ...حاجة تشل ......اوعى تتاخر ....اللى تاخده ...تروح تانى يوم على طول فى اى وقت انت فاضى فيه ...بين المحاضرات او بين الكاشن او كده ...تتفرج ع الجار ....وطبعا يكون معاك كتاب المتحف ....

العظم: لازم يكون معاك من الاول عشان وانت بتذاكر العضلات و الاعصاب والشرايين وكده لازم تبقى ماسك الحاجة بايدك ...و العضم بتشتريه من الاسر او من الكلية او بتجيبه من بره ...و لازم يكون واضح عليه المنخفضات و المرتفعات وميكونش صغير اوى او ناعم اوى ....

العظم المطلوب منك : لازم يكون كل العضم يمين او كله شمال ...خد معاك حد من المعيدين او الدكاترة ...بلاش طلبة ...عشان يختار معاك العظم الصحيح ...

عايزين : scapula radius ulna clavicle sternum humerous 1st rib 2nd rib typical rib( 10 11 12 ribs if possible)

الفقرات vertebrae thoracic lumbar sacrum :

Hip bone

مصدر المذاكرة: لو الكتاب بتاع القسم جميل ..خلاص ذاكر منه ع البركه ...بس لو الكتاب وحش ومينفعش تذاكر منه ...ابقى ذاكر من مذكرات الدروس "اختار المذكرات الكويسة ..اللى لا تقلل الماده خالص .. ولا تزود حاجات مالهاش لازمة "

وممكن تشترى كتب خارجية "بدون ذكر اسماء" بس تخللى بالك انك تحفظ منها اللى موجود عندك فى كتاب القسم ...مش تحفظ كل حاجة موجوده فى الكتاب الخارجى لانه ساعات بيبقى مزود جدا وممكن يعقدك من الماده ....

ممكن تجيب اطلس ملون عشان تشوف عليه العضلات و الاعضاء ..وكده ....بيفيد برده ...

**ملحوظة هامة جدا:

اياك ان تشترى مذكرات الدروس من المكتبات المنتشرة حوالين الكلية ...لانها بتكون قديمة و ناقصة و من المنهج القديم و بتبقى ناقصة حاجات مهمة كتير ..وحتى ممكن يكون الاسم مضروب و تكون مش بتاعة الدكتور اللى انت فاكرها بتاعته...وانما اشتريها من المكان اللى الكورس بيتاخد فيه ...اللى اسمه "سنتر " ..لان الدكاترة اللى فيه مش بينزلوا مذكراتهم الا فى السناتر دى ....والاحسن انك تخلى حد صاحبك من اللى بياخدوا درس يشتريلك ..او تصور منه مذكرته

الادوات اللازمة: بالطو + جوانتيات بلاستيك او نايلون عادى .

____________________________________________________________________________________________

الفسيولوجى

يعنى ايه ؟

دى المادة اللى بتدرس فيها الfunctions بتاعة اعضاء الجسم ...يعنى لما تحب تعرف الfunction بتاع اى حاجة ارجع للفسيو ...لانه هو المتخصص فى الوظائف يعنى انت مثلا عرفت الكلية وشكلها وعلاقتها باللى حواليها فى التشريح ..هتيجى فى الفسيو بتاع سنة تانية وتعرف طريقة شغلها تمام و هكذا فى بقية الاعضاء الهامة

فروع الدراسة؟

BIOPHYSICS " ورقتين تاعبانين كده ...بتاخدهم فى الاول ...مالهمش علاقة ببقية المنهج خالص ...بس مهمين جدا فى الدرجات ...حوالى 10 درجات ع الاقل على مدارالسنة ...لازم تخلص منها فى الاول رغم انك هاتحس انها صعبة ,لانها اول حاجة بتاخدها ...سيبك من الشعور بالصعوبة و الكلام ده ...اطحنها واحفظها وراجعها عشان تستريح منها ...عشان درجاتها كتير زى ما قلت .."

Nerve&muscle

Autonomic nervous system (ANS)

Cardio + vascular systems

Blood

Respiration

درجات المادة و توزيعها :250 درجة و النظرى طبعا اكتر درجات يليه اعمال السنة ثم الشفوى و العملى

طريقة المذاكرة :

تتميز مادة الفسيو بانها اكتر ماده السنادى عايزة فهم .....(عن نفسى دى كانت اكتر ماده بحبها فى السنة دى كلها) لانها ببساطة بتجعل منك طبيب ..وزى مابيقولوا فى الامثال الطبية :

"الطب هو الفسيولوجى وشوية حاجات كده فوق بعض .."

وفى نفس الوقت ماده عايزة حفظ صم ...ومراجعه كتيير ...بس مش اكتر من الهستولوجى ....المهم ...انت مجرد ما بتذاكر الحاجة وتراجعها كام مرة كده ...بتلاقيها خلاص بقت تافهة و سهلة جدا ....المهم انك تجيبها اول باول و تحاول تسال فى الصعب ...نقول تانى ..اهم حاجة انك تحفظ اول باول و متضيعش و لا تنفض ...تمام؟؟ اللهم بلغتُ .

السكاشن:

من المهم جدا انك تذاكر العملى "التجارب " اول باول مع كل سكشن ...اللى تاخده فى السكشن ..تعرفه كويس و تروح تذاكره كانه محاضرة نظرى عادى ...وتخلى بالك ان منهج العملى بتاع الفسيولوجى هو اكبر عملى عندك فى الكلية لانكب تعمل فيه التجربة وتتسال عليها نظريا و بتتسال كمان شفوى!!!ألهوى!!اه ...هو كده فى الفسيو ...عشان كده لازم تذاكر العملى من اول السنة اول باول ...وتذكر دايما "ولكل درجات مما عملوا و ليوفيهم اعمالهم و هم لا يظلمون"

مصدر المذاكرة:

لو كتاب القسم كويس ومناسب للمذاكرة ...يبقى ع البركه ...اما لو كتاب القسم ملعبك و وحش يبقى اشترى المذكرة الانسب من مذكرات الدروس ...اوعى تدنك تشترى فى مصادر و تضيع وقتك ...فى المفاضلة بينهم ...شوف الانسب و اختار الافضل ...وذاكر دايما من مصدر واحد ...مع مراجعه كتاب القسم كده عشان لو حاجة ناقصة او الدكتور بتاع الدرس حاذفها عشان مش مهمة ...ابقى اقراها كده ع السريع

بالنسبة للعملى:

اشترى مذكرة العملى بتاعة السنة اللى فاتت ..فى اول السنة عشان تذاكر منها من الاول ... واوعى تشترى مذكرة تاعبانه و منعكشة تسد نفسك ...ولكن اشترى المذكرة الكويسة اللى فيها تنظيم و صور وساعات الوان ...وابقى اسال الناس بتوع سنة تانية عن مذكرة كويسة للعملى...

الادوات المطلوبة :

بلطو بس .. جهاز ضغط و سماعة "عشان تتمنظر بيهم على اهل حتتك و اسرتك ...ههههه" بس ما تستغلاش ...هم مش مهمين اوى اصلا ..

____________________________________________________________________________________________

البيو كيميسترى

يعنى ايه؟

دى الماده اللى بتدرس فيها اصغر حاجة فى الدنيا ....لا عضو على بعضه و لا شريحة منه ..وانما ايه التفاعلات الكيميائية اللى بتتم فيه ...

فروع الدراسة؟

بتدرس الكربوهيدرات

و البروتين

والدهون

و الفيتامينات "مهم جدا لك كطبيب "

والانزيمات

والDNA

درجات المادة وتوزيعها : الماده ب 150 درجة ...نظرى>شفوى+اعمال سنة +عملى...

طريقة المذاكرة : مادة لذيذة جدا و جميلة بس للاسف ممكن تتدرس فى الاول بطريقة تخليك تكره نفسك!!!0 ...بس غالبا كله بيجيب فيها درجات حلوة جدا جدا ...وزيها زى غيرها ممكن طبعا تجيب فيها الدرجة النهائية.... بس لازم مذاكرة و دح و سهر عشان ربنا يكرمك .....

السكاشن: ...لازم تحضر كل الكاشن و اوعى تفوت ولا واحد لانهم بيشرحوا التجارب بتاعة العملى فى السكشن و بيراجعوها على طول فلازم تكون متواجد عشان العملى يبقى اسهل ما يمكن باذن الله ....وتعتبر اسهل ماده فى العملى ... وكل الناس بتقفله...

مصدر المذاكرة : كتاب القسم او مذكرات الدروس"اشتريها من السناتر ..اياك تجيبها من المكتبات عشان بتبقى مضروبة و قديمة ووحشة"

الادوات المطلوبة: بالطو + علبة ادوات البيو

...___________________________________________...

الهستولوجى

يعنى ايه ؟

دى المادة اللى بتدرس فيها الحاجة تحت الميكروسكوب ....بتدرس فيها الخلايا و الانسجة .....

فروع الدراسة؟

فروع جميلة خالص^___^ هم 12 شابتر هتشوفهم بنفسك ان شاء الله مش لازم اكتبهم *__^...

درجة المادة : 150 درجة

*طريقة المذاكرة"هام جدا جدا جدا " : تتميز مادة الهستو ..بانها اكتر ماده "طيارة" بتفكرنى بالبنزين العطرى كده ...بتتبخر من الدماغ فى ثوانى ...عشان كده محتاجة مذاكرة و مراجعه مستمرة ...ولازم تحل mcq "اختر من بين القوسين" كتيييييير عشان اللى بتحفظه يثبت فى الدماغ ....و ع العموم هى ماده سهله للى بيذاكرها ... ولكن ممكن تتحول لكابوس لو دنيتك مأخرها و مش بتذاكرها ...

عشان هى ماده عاملة كده و كلها خلايا متشابهة و ممكن تلخبطك ...فالحل السحرى هو فى نظام المذاكرة بالجداول ...يعنى مثلا انت عندك 8 خلايا ..طبعا مينفعش تذاكر كل واحده لوحدها ...دماغك هتشيط ...!!! ولكن اعملها فى نظام مقارنة ...تحط فى خانة وجه المقارنة ...الحاجات اللى هاتقارن ما بينهم ...زى الشكل, الحجم, المصدر اللى الخلايا جاية منه , الوظيفة ..الشكل بالميكروسكوب الضوئى ...الشكل بالميكروسكوب الالكترونى ...وهكذا ..

وصدقنى بجد ...الطريقة دى اجمل طريقة تذاكر بيها فى وقت اقل .. و بكفاءة افضل ..جربها كده فى الهستو .. و برده فى المواد التانية و خصوصا الاناتومى ...لانك بجد فى حاجات فى المنهج لازم تستخدم فيها طريقة الجدول ...

حاجة كمان تتميز بيها ماده الهستو ...و هى الرسم !! انت بتستلم كراسة العملى و دى بترسم فيها الشرايح اللى عيك فى الاطلس اللى بتستلمه برده ...

ملحوظة غاية الاهمية ....الرسم عليه اكتر من خمسة عشر درجات !!! تخيل!! خمس درجات على كراسة العملى .. و خمس درجات على الرسم فى العملى...وكمان ممكن فى اعمال السنة يكون فى امتحان رسم ...عليه ييجى خمس درجات ...معنى كده انك لازم تهتم بالرسم جدا من اول شريحة و من اول صورة عندك فى الكتاب .....اياك تقعد تهزر و تلعب فى السكشن او تقلب منه من الاساس ....لا ..مينفعش ...لازم ترسم من الاول كل الرسومات اللى عليك رسمة برسمة ...عشان تقدر تفهمها و تتقنها ....لازم..موضوع الرسم ده ...ممكن تعيش فى قرف عشان معاد تسليم الكراسة جاء و انت لسة مرسمتش حاجة ...بتبقى ايام ما يعلم بيها الا ربنا ...وبتضيع وقت اد كده عشان تحاول ترسم البلاوى المتلتلة دى كلها .....وليه يا عم كل ده ... ما من الاول تخلص نفسك ...اللى بتاخده تروح البيت تخلص رسوماته فى اى وقت انت فاضى فيه : "بين المواد " او وانت بتاكل هههه ...اتصرف وفضى نفسك عشان ترسم الرسومات دى ...لانها عليها درجات زى باقى الحاجات ...اياك ان تهمل فى اى مادة ولا فى اى جزئية ..عشان ربنا يكرمك و يوفقك ...

سكاشن : زى البيو كده ... لازم تحضر برده ...عشان تشوف الشرايح تحت الميكروسكوب و تسمع شرح العملى ....والسكشن بتاع الهستولوجى يتميز بانك بتقعد ترسم فيه الرسومات اللى عليك ...(اوعى تمشى من غير ما ترسم ...اللهم بلغت) ..

مصدر المذاكرة : كتاب القسم او مذكرات الدروس"اشتريها من السنتر او صورها من واحد صاحبك بياخد درس ما تشتريش من المكتبات "

الادوات المطلوبة: بالطو ...عشان البريستيج مش اكتر...+ قلام هستولوجى عشان الرسم ...(الوان خشب ..واحد ازرق وواحد احمر ...)

__________________________________________________________________________________________________________الهدف______________________________أذاكر ليه؟؟!! ____________________________________________________________________________________________

بيحصل احيانا ان الواحد فى بداية الكلية ....اذا كان تايه و مش عارف ازاى يتغلب على العقوبات اللى ممكن تواجهه ....بيحصل ان ممكن يتوه بجد ...يعيش كده من غير اى سبب واضح ومن غير ما يعمل حاجة ف حياته و يقعد يتساءل ....أذاكر ليه؟؟

اياَ كانت الاسباب اللى ممكن توصل الواحد للمرحلة دى فانا باذن الله هكتب لك دلوقتى ايه الاهداف اللى ممكن تسعى لتحقيقها بواسطة المذاكرة , حتى تكون دافعا لك كى تبذل اعظم مجهود و تخرج اقصى قدراتك باذن الله .........

انت لازم تذاكر و تطحن نفسك حفظ و فهم و مذاكرة ومراجعة و تنظيم و حل اسئلة الامتحانات سابقة من اول يوم .....عشان الاتى:-

1) بكل بساطه لان هو ده الصح !.......لانك لو ماذاكرتش و ماجتهدت مش هتبقى اى حاجة خالص ...ومش هتوصل لاى حاجة تحقق بيها هدفك لدينك او لبلدك او لنفسك ...و لان دى طبيعة بشرية ان الانسان لازم يجتهد ويزرع الاول ...عشان يحصد و يستريح بعد كده ....اذن لازم تذاكر ...

2) انك تتعين الجامعة ....و ما تترميش فى وزارة الصحة ....وما ادراك ما الفارق الرهيب بين الاتنين ....على كل المستويات :

على المستوى المادى : مرتبات دكاترة الجامعة اكتر بكتير جدا من مرتبات الصحة ..وخصوصا النظام الجديد ...لان دكتور فى الصحة بياخد 250 جنيه !!!! اما دكتور الجامعه بياخد الاف ...ده غير ان دكتور الجامعه ممكن يدى كورسات و دى ماشاء الله

ع المستوى المهنى: معظم دكاترة الجامعة سمعتهم بتبقى فى السما و عيادتهم بتبقى شغاله مية مية .....و كفاية انه يكتب ع اليافطة بتاعته ..."استاذ بكلية الطب جامعة كذا "...

ع المستوى المهنى : اللى بيتعين فى الجامعه ...بياخد الدكتوراه بمنتهى السهولة ....اما بتاع الصحة اخره ماجستير ...ممكن يموت قبل ما يشوف الدكتوراه ...وانما ممكن ياخد زمالات و حاجات من دول تانية ...انما الدكتوراه من مصر بتبقى صعبه جدا...

عشان تبقى عالم و باحث مشهور بان الله :طبعا انا عارف ان معظمنا مش عايز يكون مجرد دكتور و خلاص يعيش و يموت دكتور و بس...وان كل منا نفسه يبقى عالم و ناصر لدين الله و ناصر لوطنه و بلده ...و اول الطريق(او قل :اقصر طريق) لده هو انك تكون متعين فى الجامعه ... اللى بيتعين فى الجامعه ممكن جدا يجيله بعثة بره مصر ...وباذن الله ربنا يكرمك و تشرف دينك و بلدك فى العالم كله ...وتبقى العالم المسلم المصرى/(...........) ....لكن لو طلعت من الجامعة بيبقى صعب اوى ...بس لو ربنا مقدر لك يبقى مفيش كلام ...الخيرة فيما اختاره الله ...انا اقصد ان الحاجة طالما فى ايدك ليه تضيعها منك ..

ع المستوى الشخصى : عشان تثبت نفسك و تتفوق على زمايلك ...وصدقنى هو ده اكتر حاجة ممكن تحفزك و تنشطك و تخليك تذاكر و تجاهد ....انه سر التنافس ...بجد ده ممكن يغير لك حياتك .....نافس اقرانك اشمعنى هم يذاكروا و يبقوا سابقين ومسيطرين وانت نايم فى الوهم ؟؟!! عيب يا اخى حتى .. ... و التنافس الداسى ده مش عيب و لا هو حاجة تافهة مثلا ...بل هو من اعظم الاعمال الشريفة اللى ممكن تعملها ...عش بالتحدى عش بالكفاح عش بالامل ..عش بالنجاح و الرفعة ...بص لفوق دايما ...اطمح بجد ....عيش بجد ....ماتبصش تحت رجليك ...بص للسماء عشان تطلع لفوق ...ماترضاش باقل من "الاول " , و لو مطلعتش الاول السنة دى ..هتكون من الاوائل ....والسنة الجاية تشد حيلك اكتر ... يعنى كده كده انت الكسبان ....فقط عيش بالكفاح و المنافسة الشريفة و التحدى ....وواجه العالم بهدفك .... و اياك تيأس او تَهِن ..او تتهاون فى اهدافك ابدا ...مهما بدا الامل مستحيلا ...تيقن انه اقرب مما تتخيل..وان مفيش حاجة بعيده على ربنا ابدا....

3) اتخيل كده ساعة النتيجة و العشرة الاوائل بتتعلن اسماءهم ....انت متحبش تكون الاول ؟؟؟ او ع الاقل : ماتحبش تكون واحد من اول عشرة؟؟ ..اظن كده الرسالة وصلت

4) عشان تفرح اهلك ...اللى صارفين عليك و تاعبانين معاك ...ونفسهم يفرحوا بيك ...و دى من اعظم سبل البر بالوالدين انك تفرحهم و تسعدهم بنجاحك

5) ان العشرة الاوائل فى نظام جديد ...يا ريت يطبق ...كلواحد فيهم له ((آى باد)) X_X ...اظن ده كفاية اوى عشان تذاكر ههههههههه.

6) عشان الترتيب تراكمى ....يعنى تخيل انك طلعت ال120 و ال 119 جايب اكتر منك بدرجة واحده ...و على حظك الكلية مش عايزة اكتر من 119 ...اعوذ بالله يا اخى من الموقف ده ...درجة ؟؟؟؟!!!!! ...اه الدرجة و الربع درجة بتفرق ...متصدقش حد يقوللك غير ده ...كل درجة مهمة فى طب ...

7) عشان لو انت عايز تدخل "عيون " لازم تبقى من اول 5 على الاقل فى الترتيب التراكمى D: ....وكذلك عشان تدخل القسم اللى انت بتطمح اليه ... لان لو مجموعك "ترتيبك" التراكمى قليل عن اللى القسم ده محتاجة ...ساعتها احب اقولك انك مش هتخش هدفك _والعياذ بالله_... و الله يتولاك برحمته ساعتها .....عشان كده لازم تحط فبالك انت مش فى اولى اعدادى ..سنه هبلة و هتعدى ..و كده كده هتخش تانية اعدادى.!!.. لا !! انت لازم تعرف ان التقدير تراكمى يعنى تخلى بالك ان فى سنوات جامده زى رابعة و خامسة و ساته ... وفيهم الدرجات بالهبل ....فمتضيعش نفسك فى سنة اولى عشان ماتندمش انك ضيعت درجات منك فى "اتفه" سنة فى الكلية ...

____________________________________________________________________________________________

____________________________________________________________________________________________

موضوع مهم !!! (الكورسات !!!!)

================

كل الناس فى اول السنة بتبقى مستغربة جدا حكاية ان حتى كلية طب بيكون فيها كورسات..

الكورسات فى الكلية دى استمرارا للواقع اللى اتربينا عليه طول عمرنا من اول اولى ابتدائى لحد ثانوى ....و مما لا يخفى على احد ان احنا مدخلناش طب الا بالدروس .....للاسف......

>>>>بس فى الكلية الدكاترة بيشرحوا مش زى المدارس ..ولا ايه؟؟؟؟

>ايوة طبعا بيشرحوا ..و كل حاجة ... وفى ناس ممتازة بمعنى الكلمة بتشرح فى المحاضرات .......بس برده فى اوقات محاضرات ما بنفهمش فيها كلمة واحدة ...زى اول محاضرات كده غالبا ....و ده مش عيب فى الماده العلمية للدكتور اللى بيشرحلك لا سمح الله...بس دى بتبقى طريقة توصيل المعلومة ...مش اكتر ....فى عالم ....بس للاسف محدش بيفهم منه حاجة...و فى دكتور ممكن تكون الماده العلمية بتاعته اقل...بس بيوضح و يفهم جدا و الناس بتستريح لطريقته ..........

بس خللى بالك ان الدروس دى مش اجبارى زى ثانوى كده ...لا ....نسبة الناس اللى بتاخد دروس فى طب ...اقل من الناس اللى بتحضر محاضرات الى حد ما ....و بشرى سارة ....العشرين الاوائل مفهومش خمسة ستة كانوا بياخدوا دروس .....والباقى كله كان بيحضر محاضرات بس .....و الدكاترة اللى بتدى دروس نفسهم معظمهم(او كلهم ) محدش فيهم كان بياخد درس وهو طالب !!

___معنى كده ان الموضوع سهل جدا و مش محتج تشنج عضلات....و الله لقيت المحاضرات كويسة و انت بتفهم منها خلاص يبقى ع البركه ....اما لو في حاجة صعبة و انت حاولت بكل الطرق "لسة هاقولها لك دلوقتى اهو" وبرده لقيتك مش فاهم النظام او مش عارف تذاكر صح ....خلاص جرب كده الدروس ....بس ما تتاخرش عن 3 اسابيع او شهر فى الضياع....لقيتك ضايع متستناش اكتر من 3 اسابيع او شهر كده ....و فى نفس الوقت ما تقعدش تستنى الشهر يعدى و انت مابتعملش اى حاجة ....لازم تسعى و تجتهد و تبذل كل جهدك ...اوعى تيأس او تنفض او تتخنق من حاجة ...عندك فى الكلية اى دكتور او معيد يتمنى انه يساعدك و فى كل المواد ...اسال الدكاترة فى الكلية ..قبل ما تلجأ للدروس وتكلف اهلك مصاريف زياده و تتعبهم .......

اللى فات ده كان الواقع اللى بيحصل ....

اما المفروض : انك ماتاخدش دروس خالص .. لانها زى الدوس الخصوصية كده غير قانونية خصوصا بعد تنفيذ "النظام الجديد بتاع المجموعات بدل المحاضرات " و هو معمول عشان يمنع الدروس و يوفر خدمة افضل للطالب ...

و لازم تجرب كل الطرق و تتخذ كل الوسائل عشان تنجح و تتفوق من غير ما تلجأ للدروس.....

و الطرق دى كالاتى:-

1) انك تركز جدا جدا جدا فى الشرح سواء فى المحاضرة او السكشن ...متتكلمش مع اللى جنبك و لا تقعد تهزر وتضحك ولا تعمل اى حاجة غير التركيز فى الشرح ..... واسأل الدكتورعن اللى انت مش فاهمه ...ولو مفيش اسئله فى المحاضرة يبقى اسال فى السكشن

2) لو بعد ما ركزت و كتبت الحاجات المهمة ورا الدكتور و برده لقيتك مش فاهم .....يبقى تخلى حد يترجم لك الكلمات الصعبة ..و لما تروح البيت كمل انت ترجمة ..و اشتغل حفظ ...و مذاكرة ...

3) لو برده لقيتك مش فاهم ...اسأل اى دكتورمن الدكاترة اللى فى القسم بعد ما المحاضرة تخلص على طول ...وهم هايجاوبوك على طول ...

4) لو بعد كل ده و برده مفهمتش ...خلاص ...حمّل صوتيات شرح المادة (فسيولوجى مثلا) من ع النت ....عندك منتديات و مواقع طبية كتيرة جدا و مليانة شرح للدكاترة ...

5) لو برده مفهمتش ....خلاص يبقى خلى حد من زمايلك اللى بياخدوا دروس يسجل للدكتوربتاع الكورس و خدها منه بلوتوث او لو رفعها(upload) ع الفيس او على منتدى معين ...ابقى حملها من عليه .....عن نفسى : افضل انك تحمل التسجيلات بتاعة الدروس اللى تخص كليتك انت ..انت مثلا فى الزقازيق ...خلاص يبقى داونلود التسجيلات بتاعة الزقازيق او خدها من حد صاحبك من بتوع الدروس ...لان بيبقى فى اختلافات بسيطة بين الكليات و بعضها و كمان الدكتور بتاع كليتك بيبقى عارف نظام الامتحانات فى الكلية و ايه الحاجات المهمة و ايه اللى مش مهم اوى...مهم جدا حكاية التسجيلات دى لانك بتقدم الوقت بتنسى اللى فات وبتبقى عايز تسمع الشرح تانى ...حتى لو انت هتاخد دروس ..برده خلى معاك تسجيلات الدكاتره اللى بتاخد عندهم ....و ابقى اديها لصحابك او ارفعها ع النت (بدون ما تضيع وقت مذاكرتك طبعا)....تخيل كده كام واحد هيسمعوا التسجيلات اللى انت رافعها و هاتفيد ناس اد ايه ...يعنى ثواب موووووت ....ومش هيخلص ...لان ده علم يعنى طول عمر الانسان عمال تاخد فى ثواب بحاجة بسيطة جدا و هى انك تبعتهم بالبلوتوث او ترفعهم ع النت.....(فى ساعة الترفيه بتاعتك ابقى ارفعهم ع الجروب بتاعكم ع الفيس ...حاجة مفيده اهى)

ودى حاجة جميلة جدا للناس اللى مش هتاخد دروس لانهم هيستفادوا من المحاضرات و برده هايستفادوا من التسجيلات بتاعه الدروس بدل ما يضيعوا وقت

6) لو الكتاب بتاع القسم مش عاجبك ..او مش منظم ...خلاص اشترى مذكرات الدروس... وخصوصا لو انت هاتسمع التسجيلات بتاعتهم...كتير من الناس بتذاكر من المذكرات بس النسبة الاكبر بتذاكر من الكتب...

7) يوجد الكثير من الاساتذة المحترمين بيعملوا محاضرات شرح مجانية او مخفضة التكاليف .... وبتكون فى الكلية بس مش تبع النظام الاساسى يعنى دى من كم اخلاق الدكتور ..مش حاجة تبع الكلية ...

8) لو بعد كل ده و لسة ....يبقى انت مش عايز تتعب ..عايز تريح نفسك ..وتروح ع الدروس ...بس صدقنى المحاضرة بتجعل منك طالب جامعى بجد ..اما الدرس فانت كانك لسة فى المدرسة ...مفيش حاجة اتغيرت

بس زى مانت عايز... لو معاك امكانية مادية و نفسية للدروس محدش يقدر يلومك بس المهم انك تذاكر دى اهم حاجة...

====================================================================================

* طرق ابداعية للحفظ فى الكلية *

%%%%%%%%%%%%%

نظرا لان الكلية بيبقى الحفظ بالانجليزى فى البداية غريب عن اللى انت متعود عليهطول عمرك ...عشان كده فى طرق جميله جدا و مفيده هاتساعدك فى الحفظ ..و تثبيت المعلومات .......وفى بعض الاوقات بيبقى حتما عليك انك تستخدم حاجة من الطرق دى ...لما تكون مثلا مستعجل و عايز تحفزبسرة شان فى امتحان مفاجىء ولا حاجة ...و عموما ..عشان تسهل عليك الامر و تحببك فيه.............

منها الاتى:-

1) الاوان .....عشان تحدد جوانب الدرس اللى عليك مذاكرته ..ادى مثلا العناوين كلها لون معين ...اصفر مثلا (سواء فسفورى او خشب )

و لو فيه حاجة مكونة من 7 او 8 حاجات ...زى مثلا اعراض مرض او استخدامات دواء ...ادىها لون معين ..وهكذا استخدم الالوان زى مانت عايز

بس لكل حاجة حدود.....يعنى ماتضيعش وقت المذاكرة كله فى التلوين ...يا فرحتى لونت الكراسة و خليتها ولا عروسة المولد و فى نفس الوقت ماذاكرتش حاجة .......كل حاجة بالمعقول ...استخدم الالوان بس من غير اسراف....

2)الرسومات ....يعنى لما تلاقى سطر فيه كلمة liver يعنى كبد ...ارسم جنبه رسمه الكبد ...و هكذا فى بقية الحاجات ...فلما تيجى تذاكر بعد كده مش هاتبص للكتابة و لكن الصورة هاتفكرك ....بالكلام

3) خد الحروف الاولى من كذا سطر و كون بيهمكلمة معينة ...زى (قلبه"his heart يعنى"=klbh) ترمز ل kidney >>liver >>>brain >>>heart

مفيدة جدا الطريقة دى فى حفظ الفروع بتاعة الاعصاب و الشرايين و غيره...استخدمها فى الاناتومى فى الupper عشان تحفظ الاعصاب و الشرايين المختلفة و ما تتلخبطش بينهم ....

4) ترجم كلمة من كل سطر كده تدل على محتوى السطر....

زى الوظائف بتاعة الspleen الطحال...هم 4 كلمات ...مخزن مصنع مناعة مدفن .....

فهو مصنع لكرات الدم الحمراء

ومخزن ل250 مل دم

و له دور مهم فى المناعه

و مكان لتكسر كرات الدم الحمراء

5) الحرف الاولى من كل كلمة ...زى مثلا اسباب تدمير النخاع العظمى (ii tt) ...irridiation : اشعاع

infection : عدوى

toxin: سموم

Tumor: ورم

6) كون اغنية باسماء الحاجات (ادوية مثلا) ....و انت عارف من علم النفس ان الاغنية اسرع فى الحفظ من الكلام العادى

7) التكرررررررررراااااااااااااااااااااااااااااااااااااااااااار...هو اهم عنصر فى المذاكرة ...كل الست طرق اللى فوق دول و غيرهم ..عبارة عن طرق مساعده للحفظ ..ولكن عملية الحفظ نفسها = التكرار ...يعنى و انت بتذاكر كرر و لما تخلص لازم تراجع ..زى ما قولنا فوق...لازم تراجع ..لازم تتمرن على mcq

__________________________________________________________________________________________

خطوات اعداد الشحصية الطبية

......(هام)

________________________

هناك خطوات لابد منها قبل ان تدخل الجو الدراسى .... حتى تصل باذن الله الى القمة و الى التميز المنشود.....و هى كالاتى :-

* الاصرار التام ...لازم تكون مستعد لتحقيق هدفك بكل السبل الممكنة ...ما ينفعش حاجة تعطلك او تاثر فيك او تصفك عن هدفك.....عايز تعف امتى يبان الاصرار ده ؟؟....لما تكون سهران عشان عندك شغل كتير ..ولازم يخلص النهارده (مذاكرة اليوم بيومه مثلا)...هاتكون تعبان موت و نفسك تنام ...بس بتقعد و تغصب على نفسك و تشب فى قهوة و تجرى و تتنشط و تغسل راسك و تجاهد عشان تصحى ..وتفوق...ساعتها بيبان اوى الاصرار على تحقيق الهدف .....

* الالتزام و الانضباط :- ...لازم تكون ملتزم و منضبط بجد ....مفيش حاجة اسمها تضييع الوقت ...اعتبر نفسك فى جهاد ...انت مسئول عن الوقت ده ...لازم تكون على قد المسئولية ....استشعر قيمة الدقيقة ....تخيل نفسك دايما كان صابح عليك امتحان اخر السنة ....اكيد طبعا فى اليوم اللى قبل امتحان اخ السنة مفيش حد فينا بيلاقى وقت للاكل حتى ....هو ده المطلوب....لازم يكون حصك على وقتك كده بالظبط ...لازم تكون حريص على وقتك ...حتى لو كان عندك ايه فى بيتك ..شغلك و هدفك فى المقام الاول..ومفضل على اى حاجة....(طبعا بعد اداء المفروض عليك من صلوات وعبادات)

* لا تتكلم ..لا تثرثر ..ركز فى شغلك ..ماتدنكش تشتت انتباهك ...الزم الصمت (مش تخرس يعنى ...بس بلاش تقعد تتكلم ع الفاضى و المليان ) و تأكد ان الافعال اعلى صوتا من الكلمات ...

* لا تنزعج و لا تجزع .. اذا لقيت نفسك مش فاهم حاجة فى المحاضرة خالص ...و لا يهمك ...لسة عندك فرصة الترجمة و انك تفهم مع نفسك ...او تسمع التسجيلات ...او تسأل الدكاترة ...اهم حاجة انك تكون عايز تفهم و تذاكر مهما كانت الظروف"الاصرار و التفاؤل" ...وصدقنى مفيش حد بيجرى و يسعى على مصلحته و مابيوصلش ....

*"هام جدى" ... انسى حاجة اسمها face book ارميه فى الزبالة خالص !!! ....لانة اكبر حرامى وقت بجد ...على ما تقرا المنشوات بتضيع اكت من ساعتين ...ما بالك لو انت بقى عايز تكتب منشور...يبقى اليوم ضاع ...و يوم ورا التانى ...يبقى ضيع منك حياتك ....لانه بيربطك بيه ...لانك بتكتب البوست ...و تقعد تستنى تشوف التعليقات و تعجب بيها ...و يا سلام لو دخلت فى نقاش او جدال ...اعوذ بالله يا شيخ من ده موقع اسود....طبعا انا اقصد الناس اللى "مدمنين" ع الفيس ...عشان كده لو لقيت نفسك "مدمن!" فيس ...اعرف ان الادمان ده يتنافى تماما مع الجد و الاجتهاد و الهدف اللى انت عايزه....انسى بقى كل اللى كنت بتعمله فى الاجازة و ابدا بقى حياة الدراسة: "اخلاص..التزام ..اصرار ..انضباط... حفاظ على الوقت .."

لو لقيت نفسك الفيس ده مسيطر عليك.....احلف على نفسك !!!يعنى قاطعه تماما بقى غصب عن نفسك دى ....انت سيد قرارك مفيش حاجة اسمها ادمان  ....ارمى كل حاجة تعطلك ورا ضهرك ....

الفيسبوك ...مش معمول عشان ندخل نهلس ونضيع وقتنا عليه...استخدمه فيما يفيدك و ينفعك و بس ....

و فى مشكلة رهيبة و خطيرة وللاسف شائعة ...وهى :  الحب علي الفيسبوك  :

نظرا لان معظن الناس دلوقتى بقى عندها نت فى البيت ...فبقى الدخول ع الفيس سهل اوى ...كل ما تكون عايز تخش ...تقوم داخل و نظرا لانك مازلت فى مرحلة المراهقة ..على اعتاب مرحلة الشباب ...و دخلت الجامعة بقى ..وكده ...ونظرا للفكرة السيئة اللى رسخها الاعلام فى اذهاننا ..وهى الاحتياج العاطفى و الاختلاط بين الجنسين ...وخصوصا فى الكليات المشتركة...مع حالة التوهان و استشعار الصعوبة فى البداية ...فالواحد التعبان اللى مش عنده اصرار او اجتهاد بيلجأ الى اى حاجة تنسيه همومه ..فى اللى بيلجأ الى...او الى....او الى "الحب"...فالراجل ده يقعد ينشر فى منشورات عامة ع الفيس بس بيخاطب بيها شخص معين ..و فى من الناس اللى بيتعدى الامر و يرسل ع الخاص...والعياذ بالله ...و دى اكبر خيانة و تعدى للحدود ...وحراااام ! شرعا ..ده لو كنت بتعلمها القران ..مينفعش الاختلاء ده و لو كان اختلاء الكترونى.....المهم...بيعيش بقى الاتنين سواء ع المنشوات العامة "المعظم" او ع الخاص"و العياذ بالله" بيعيشوا بقى قصة الحب المزعومة ....و ده شعور طبيعى ..اعجاب ثم انجذاب ثم تعلق ...وهكذا ....طبيعى بس مش فى وقته ....اولا احنا كمسلمين و لله الحمد ...مفيش عندنا اى حاجة اسمها علاقة تجمع الطفين ...الا الزواج الشرعى....وانت يا بنى يا حبيبى كولد لسة قدامك الطريق تدرس و تذاكر وتصنع مستقبلك ....و حتى لو معاك الامكانيات المادية ...انت مينفعش تتجوز دلوقتى ...لانك بصراحة فى نظر ابو اللى انت تعتقد انك بتحبها"وخلى بالك من كلمة تعتقد دى" مجرد عيل! ..يعنى انت يابنى لسة بتاخد مصروفك من باباك ....فبالعقل كده اقتنعت اهو انه مينفعش علاقة دلوقتى خالص باى صورة من الصور....

ثانيا: انت مينفعش تقعد معلق البنية معالك 7 سنين على ما تخلص .. وكام سنة على ما تكون نفسك ..!!!X_X ده كل الامور هاتكون اتغيرت ...اولا انت نفسك نظتك ليها هاتكون اتغيرت و ممكن تلاقى ان ده كان مجرد هبل عيال و انه مش (حب) بمعناه الواسع المتكامل و ماكانش اى حاجة ...ساعتها هايكون ايه الموقف ....

كلامى السابق ده كان للولاد ...اما كلامى للبنات : فانت درة مصونة ...متخليش اى عواطف او احاسيس غير ناضجة ...تجرفك بعيد عن الطريق الصحيح .....عيشى بمبدا العفة و حب الله "قلبى ملك ربى و ربى حبيب قلبى" ..وتأكدى ان شعور الاعجاب ده محدش يقدر يمنعه ...انما التمادى فى الامر ...ده حاجة ارادية و فى ايدك تمنعيها ...فقط اعلمى ان الامر بيد الله و ان النصيب مقدر ومكتوب

و تخيل كد يا صاحبى لو ان فيه واحد زى حضرتك كده و بيحب اختك برده و شغال فى منشورات و كلام من ده ...ويا سلام لو زاد الامر عن حده بقى و ...و ...و....و....(ربنا يعافينا جميعا) اكيد طبعا ماترضاهاش على اختك ...وكذلك محدش يضاها لبنته او لاخته .....راعى ربنا فى عباده عشان بنا يكرمك وينجيك........

وافتكر دايما يا صاحبى ....

"من تعجل شيئا قبل اوانه ....عوقب بحرمانه"

"" لا للصحوبية ...خليه شعار للعفة فى حياتَك و حياتِك""

"" بلا حب ..بلا بتنجان اساحبى"

"كذاب اللى يقولك مفيش احلى من كلمة بحبك ....دى ما تسواش حاجة جنب كلمة "ملغى" فى اخر السنة.... هاتشوف بنفسك .."

اتكلمنا فى الموضوع باختصار شديد جدا من الناحية الدينية و الاخلاقية ...

ندخل بقى فى الموضوع من الناحية العلمية "الدراسية" .....

اولا مفيش حاجة فى الدنيا ممكن تضيع منك وقت اد الحب و الكلام ده

....انت تقعد تنزل فى منشور وتستناها ترد...وتقعد تنتقى وترتب فى الكلمات بقى عشان تعرف تعبر وفى نفس الوقت محدش ياخد باله ...وتضيع ساعات وايام واسابيع وشهور كمان!!! وانت ضاااااايع ...لا انت بتذاكر قديم ولا جديد .. وعايش فى التوهان .... يعنى ضياع من كل جانب ......و مش بيفوقه غير انك تلاقى عندك امتحان كمان يومين

وانت طبعا مفيش خالص ...ساعتها بتبقى ايام ..اعوذ بالله ...محدش فيكم باذن الله يكون فى الوضع ده ...ربنا يبعدكم عن الوهم ده و ينجيكم و ايانا اجمعين .....

========================================

واظب على اذكا الصباح و المساء ....لانها وقاية من كل حزن وهم و غم .. واعانة من الله _سبحانه و تعالى_ لك....انت لا تتصور يعنى ايه حسد ....وخصوصا بين الدحيحة!!! فانت اقرا الاذكا بتامل كده و خشوع و بنا يكرمك و يحفظك ...و فى نفس الوقت

"استعينوا على قضاء حوائجكم بالكتمان" ... ما تقعدش تثرثر... و فى نفس الوقت انصح زمايلك و ما تبخلش عليهم بحاجة ...وتأكد ان ربنا هيوفقك طول ما انت بتساعد غيرك ..."كان الله فى عون العبد ما كان العبد فى عون اخيه"

*(هام جدا ) استمر فى المذاكرة والاصرار ...اياك تبدأ حلو اوى وبعد كده تهبط و يقل مستواك ....دى اخطر مشكله...تلاقى الواحد فى اول محاضرات ...يجرى و يتنطط و يسال الدكتور بعد المحاضرة و الواد ايه بقى مقطع الدنيا ...و بعد كده يهبط و يقل مستواه و ينفض ...لييييييييه؟!!!!

تاكد ان الاعمال بالخواتيم ...و العبرة بالنهاية ....

** ضرورة الترفيه!!!!....تأكد ان الترفيه ده واجب و حتم لابد منه ...لان النفس اللى ما بترفهش بتمل و تكل ... فقد روي عن النبي ( صلى الله عليه وسلم ) قوله : ( روحوا عن القلوب ساعة بعد ساعة , فأن القلوب اذا كلت عميت) .

لازم يكون عندك ترفيه يومى : ساعة ...تقرا فيها او تعمل فيها اللى انت عايزه

وترفيه اسبوعى: ساعتين كده تخرج فيهم تتفسح او تقابل اصحابك او تعمل فيهم اللى انت عايزه

ترفيه كده كل لما تلاقى نفسك كويسة و ماشية صح : اكلها حاجة حلوة او اخرج حبة تفرفش كده ...عشان ترجع بعزم اكبر و لا تمل من تعاقب الاعمال

ترفيه فى اجازة نص السنة: الحياة مش ورا بعضها خبط خبط كده...لازم برده تروح عن نفسك و تروح رحلة او ترتاح من تعب نص السنة اللى فاتت ...زلو حتى يومين ع الاقل ....

ترفيه اخر السنة : معروف طبعا

** اذا ضاقت بك الاحوال ..تأكد ان الفرج قرييييييييب ...و ان مع العسر يسر ...."ضاقت فلما استحكمت حلقاتها فرجت و ان كنت اظنها لا تفرج"

ثق بالله و توكل عليه ...هو حسبك ... هو نعم الوكيل

و ادعى ربنا دايما ...هو اقرب حد ليك....و تأكد انه هيستجيب لدعائك ...ومش هيضيع تعبك...عشان كده خلى لك نصيب من قيام الليل فى التلت الاخير من الليل ....ده الوقت اللى ربنا _سبحانه و تعالى _ بتنزل فيه و ينادى سبحانه ...ما معناه :"حد عايز منى حاجة؟ هل من مستغفر فأغفر له ؟هل من تائب فاتوب عليه؟ ..هل من ..؟؟هل من...؟"

انت بس توكل على الله و اخلص له و اتقيه فى كل امورك و ربنا مش هيسيبك ابدا...و هو امتى سابك؟؟عمره ما تخلى عنك _سبحانه_ لانه سيدك و ربك وحبيبك...توكل عليه و اخلص النية له ...و تاكد انه مش هيضيعك ابدا

**اكتب هدفك فى كل حته ...واكتبه ع الحيطة .. و ع المكتب ..و فى كل حته .....خلليه دايما قدامك ...ما تنساهوش ابدا ...و انت بتذاكر حاجة صعبة و مكلكعة و مش عاجباك..والشيطان وزك انك تنفض و تسيبك منها ...تذكر هدفك ده ...واثبت ...و ربنا يرى و يبصر ...وتذكر تانى :

"من لم يصبر على ذل التعلم ساعة , عاش فى ذل الجهل ابدا"

و افتكر " انما الصبر صبر ساعة " ...و افتكر"ولكل درجات مما عملوا و ليوفيهم اعمالهم و هم لا يظلمون"

____________________________________________________________________________________

العملى

========

اهم اسبوع هو الاسبوع اللى قبل العملى ...ما تذاكرش فيه حاجة غير العملى ....

هاتقعد تذاكر عملى الاناتومى و الجارات و العضم ..

والفسيولوجى ..التجارب و اجزاء النظرى المرتبطة بالعملى"اكبر عملى لانك بتتسال فيه شفوى كمان"...

و الهستولوجى ...هاتقعد ترسم الرسومات و تدرب عليها وتكمل الكراسة بتاعة الرسم..وتشوف الشرايح..

.و البيو العملى بتاعها بيكون ثبت و رسخ فى الدماغ خلاص "طبعا للى بحضر السكاشن و يشتغل بايده" وبيعتبر اسهل عملى ...

مهم جدا انك تذاكر الاسبوع ده عملى بس ...متقعدش تخطط انك تراجع حاجات نظرى او كده ...اهتم بالعملى بس الاسبوع ده

الاسبوع اللى قبل اسبوع العملى....اهم اسبوع فى حياتك ...لازم تكون مخلص مراجعة المواد نظرى قبل اسبوع العملى... عشان بعد العملى هاتدخل فى ايام مذاكرة امتحان النظرى بتاعة اول ماده و مش هتبقى فاضى تراجع او تذاكر حاجة بتاعة ماده تانيه...

اللهم بلغت.....

________________________________________________________

النظرى

========

*(منتهى الاهمية)لازم تلحق تراجع الماده كلها قبل يومين من الامتحان.....

عشان تراجع الماده ككل فى اليومين دول و تحل عليها اسئله mcq عشان تدخل مطمن و مرتاح

اياك تقعد تذاكر براحتك..و تلعب فى اول ايام ..وتيجى تتزنق فى الاخر و ماتلحقش تخلص....كل يوم اعتبر ان بكره صابح الامتحان ....ماتنامش قبل ما تخلص اللى عليك....عشان لو نمت و ارتحت فى اول ايام ..و ذاكرت ببطء وبراحتك ....مش هتلحق تخلص !! و لا هتلحق تراجع و اهم حاجة فى امتحان النظرى انك تكون داخل و انت مراااجع المنهج ككل فى دماغك ....لانك مش بتذاكر تانى للشفوى (بيبقى بعد النظرى على طول او بعده بيوم) انت فقط بتراجع اللى انت ذاكرته للنظرى ..يعنى مهم جدا ان النظرى يكون تمام عندك .....

____________________________________________________________________________________

كده بحمد الله وتوفيقه و عونه اكون خلصت زمتى من الكتاب ده .... يااااا رب يكون بفايده ........

تلخيص سريع كده احنا اتكلمنا فى ايه فى الكتاب ده:

اتكلمنا اول حاجة عن "من يستفيد من هذا الكتاب"

وبعدين مقدمة عامة عن الدراسة فى كلية الطب

و توضيح للحاجات الجديده عليكم

و عن مشكله اللغة والترجمة

و ايه المحاضرة والسكشن ...و عن المواد اللى عليكم و فصلنا بصورة شاملة عن كل ما يخص المواد دى و الادوات اللى هاتحتاجوها

...واتكلمنا عن الهدف ...

و عن طريقة المذاكرة ...

وعدد ساعات المذاكرة ...

و"طرق ابداعية للحفظ فى الكلية "

و نصائح عن الطالب الناجح ...و اتكلمنا عن :

النظرى

و الشفوى

و العملى

و المراجعة

و التاجيل

و الدروس .. وازاى اكون احسن من اى حد بياخد دروس

و الفيسبوك ..

و الحب ....

و ازاى الكلية متضيعش عمك ع الفاضى"القراءة اليومية"

_=====____=======________========____==

تم بحمد الله....

____________________________________

ملحوظة:

اى حاجة مش مستوعبها او صعبة عليك ...اسال واحد من الناس اللى فى سنة تانية ...بس اسال الناس اللى طالعه من الاوائل مش اى حد ...عشان محدش يتوهك و يرشدك غلط

_____________________________________

ملحوظة: معذرة عن اى اخطاء املائية ..زفهى من السرعه فى الكتابة بس ...

____________________________________

اتمنى لكم التوفيق ...واحبكم فى الله